ਮਜ਼ਾਰੀ, ਸਾਫ਼-ਸੁਥਰੇ ਵਾਤਾਵਰਨ ਨੂੰ ਤੰਦਰੁਸਤ ਜੀਵਨ ਦੀ ਬੁਨਿਆਦ ਮੰਨਦਿਆਂ ਮਜ਼ਾਰੀ ਦੇ ਨੌਜਵਾਨਾਂ ਨੇ ਮਾਨਸੂਨ ਦੀ ਪਹਿਲੀ ਵਰਖਾ ਦੇ ਮੌਕੇ ‘ਤੇ ਰੁੱਖ ਲਗਾਉਣ ਦੀ ਆਪਣੀ ਪਿਛਲੇ ਇੱਕ ਦਹਾਕੇ ਤੋਂ ਚੱਲੀ ਆ ਰਹੀ ਪਰੰਪਰਾ ਨੂੰ ਜਾਰੀ ਰੱਖਿਆ। ਭਾਰੀ ਮੀਂਹ ਦੇ ਬਾਵਜੂਦ ਨੌਜਵਾਨਾਂ ਦਾ ਉਤਸ਼ਾਹ ਅਤੇ ਵਾਤਾਵਰਨ ਪ੍ਰਤੀ ਸਮਰਪਣ ਕਾਬਿਲ-ਏ-ਤਾਰੀਫ਼ ਰਿਹਾ।
ਰਾਧੇ ਸ਼ਾਮ ਯੂਥ ਸਪੋਰਟਸ ਕਲੱਬ ਅਤੇ ਰਾਮ ਲੀਲਾ ਕਲਾ ਮੰਚ ਵੱਲੋਂ ਸਾਂਝੇ ਤੌਰ ‘ਤੇ ਛਾਂਦਾਰ, ਫਲਦਾਰ ਅਤੇ ਔਸ਼ਧੀ ਗੁਣਾਂ ਵਾਲੇ ਬੂਟੇ ਲਗਾਏ ਗਏ। ਇਸ ਮੌਕੇ ਸ਼ੁਭ ਰਾਣਾ, ਕਰਨ ਰਾਣਾ, ਲਕਸ਼ ਰਾਣਾ, ਗੁਰਦੀਪ ਸੋਨੀ, ਨਿਤਿਨ ਸੋਨੀ, ਸ਼ਿਵ ਕੁਮਾਰ, ਅਜੀਤ ਭੱਟੀ, ਦਲਜੀਤ ਭੱਟੀ, ਸੁਰਜੀਤ ਧੀਮਾਨ, ਕੈਪਟਨ ਸੌਹਣ ਸਿੰਘ ਲੰਬੜਦਾਰ, ਸ਼ੁਭਾਸ਼ ਅਤੇ ਹੋਰ ਪਤਵੰਤੇ ਸੱਜਣ ਹਾਜ਼ਰ ਰਹੇ।
ਇਹ ਸਮੁੱਚੀ ਮੁਹਿੰਮ ਮਾਣਯੋਗ ਸਰਪੰਚ ਸ੍ਰੀ ਸੋਮ ਨਾਥ ਦੀ ਅਗਵਾਈ ਹੇਠ ਕਰਵਾਈ ਗਈ। ਇਸ ਦੌਰਾਨ ਸਤਵਿੰਦਰ ਸਿੰਘ, ਰਾਜੀਵ ਕੁਮਾਰ ਅਤੇ ਸੁਰਿੰਦਰ ਪੋਸੀਆਂ ਨੇ ਵੀ ਵਿਸ਼ੇਸ਼ ਤੌਰ ‘ਤੇ ਸ਼ਮੂਲੀਅਤ ਕਰਦਿਆਂ ਵਾਤਾਵਰਨ ਸੰਭਾਲ ਲਈ ਲੋਕਾਂ ਨੂੰ ਵੱਧ ਤੋਂ ਵੱਧ ਰੁੱਖ ਲਗਾਉਣ ਅਤੇ ਉਨ੍ਹਾਂ ਦੀ ਸੰਭਾਲ ਕਰਨ ਦਾ ਸੰਦੇਸ਼ ਦਿੱਤਾ। ਉਨ੍ਹਾਂ ਕਿਹਾ ਕਿ ਹਰ ਵਿਅਕਤੀ ਜੇਕਰ ਆਪਣੇ ਜੀਵਨ ਵਿੱਚ ਘੱਟੋ-ਘੱਟ ਇੱਕ ਰੁੱਖ ਲਗਾ ਕੇ ਉਸ ਦੀ ਦੇਖਭਾਲ ਕਰੇ ਤਾਂ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਸਾਫ਼-ਸੁਥਰਾ ਅਤੇ ਹਰਿਆ-ਭਰਿਆ ਵਾਤਾਵਰਨ ਮਿਲ ਸਕੇਗਾ।
