ਦਿੱਲੀ ਪੁਲਿਸ ਨੇ ਐਤਵਾਰ ਨੂੰ ਮੁੱਖ ਮੰਤਰੀ ਰੇਖਾ ਗੁਪਤਾ ‘ਤੇ ਹਮਲੇ ਦੇ ਸਬੰਧ ‘ਚ ਇੱਕ ਹੋਰ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਦੋਸ਼ੀ ਦੀ ਪਛਾਣ ਤਹਿਸੀਨ ਸਈਦ ਵਜੋਂ ਹੋਈ ਹੈ, ਜੋ ਮੁੱਖ ਦੋਸ਼ੀ ਸਾਕਾਰੀਆ ਰਾਜੇਸ਼ਭਾਈ ਖੀਮਜੀ ਦਾ ਦੋਸਤ ਹੈ।
ਮੁੱਖ ਮੰਤਰੀ ਰੇਖਾ ਗੁਪਤਾ ‘ਤੇ ਬੁੱਧਵਾਰ ਨੂੰ ਸਿਵਲ ਲਾਈਨਜ਼ ਸਥਿਤ ਕੈਂਪ ਦਫ਼ਤਰ ‘ਚ ਜਨ ਸੁਣਵਾਈ ਦੌਰਾਨ ਹਮਲਾ ਕੀਤਾ ਗਿਆ। ਇਸ ਹਮਲੇ ਦੇ ਸਬੰਧ ‘ਚ ਆਟੋਰਿਕਸ਼ਾ ਡਰਾਈਵਰ ਖੀਮਜੀ (41) ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਤਹਿਸੀਨ ਨੂੰ ਪੁੱਛਗਿੱਛ ਲਈ ਸ਼ੁੱਕਰਵਾਰ ਰਾਤ ਨੂੰ ਗੁਜਰਾਤ ਦੇ ਰਾਜਕੋਟ ਤੋਂ ਰਾਜਧਾਨੀ ਦਿੱਲੀ ਲਿਆਂਦਾ ਗਿਆ ਸੀ ਤੇ ਐਤਵਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਤੱਥਾਂ ਦੀ ਪੁਸ਼ਟੀ ਕਰਨ ਲਈ ਉਸ ਦਾ ਖੀਮਜੀ ਨਾਲ ਸਾਹਮਣਾ ਕਰਵਾਇਆ।
ਪੁਲਿਸ ਦੇ ਅਨੁਸਾਰ, ਤਹਿਸੀਨ ਨੂੰ ਐਤਵਾਰ ਨੂੰ ਹਿਰਾਸਤ ‘ਚ ਲੈ ਲਿਆ ਗਿਆ ਸੀ। ਖੀਮਜੀ ਨੇ ਕਥਿਤ ਤੌਰ ‘ਤੇ ਤਹਿਸੀਨ ਨੂੰ ਰੇਖਾ ਗੁਪਤਾ ਦੇ ਸ਼ਾਲੀਮਾਰ ਬਾਗ ਸਥਿਤ ਨਿਵਾਸ ਦਾ ਵੀਡੀਓ ਭੇਜਿਆ ਸੀ, ਜਦੋਂ ਕਿ ਤਹਿਸੀਨ ਨੇ ਉਸ ਨੂੰ 2,000 ਰੁਪਏ ਭੇਜੇ ਸਨ ਤੇ ਬੁੱਧਵਾਰ ਨੂੰ ਸਿਵਲ ਲਾਈਨਜ਼ ‘ਚ ਕੈਂਪ ਆਫਿਸ ‘ਚ ਇੱਕ ਜਨਤਕ ਸੁਣਵਾਈ ਪ੍ਰੋਗਰਾਮ ਦੌਰਾਨ ਮੁੱਖ ਮੰਤਰੀ ‘ਤੇ ਹਮਲੇ ਤੋਂ ਪਹਿਲਾਂ ਉਸ ਨਾਲ ਲਗਾਤਾਰ ਸੰਪਰਕ ‘ਚ ਸੀ।
ਮੁੱਖ ਮੰਤਰੀ ਦੇ ਨਿਵਾਸ ਜਾਣ ਤੋਂ ਪਹਿਲਾਂ, ਰਾਜੇਸ਼ ਸੁਪਰੀਮ ਕੋਰਟ ਵੀ ਗਿਆ ਸੀ, ਪਰ ਸੁਪਰੀਮ ਕੋਰਟ ਵਿਖੇ ਸਖ਼ਤ ਸੁਰੱਖਿਆ ਪ੍ਰਬੰਧਾਂ ਦੇ ਮੱਦੇਨਜ਼ਰ, ਉਹ ਸ਼ਾਲੀਮਾਰ ਬਾਗ ਮੁੱਖ ਮੰਤਰੀ ਦੇ ਨਿਵਾਸ ਵਾਪਸ ਆ ਗਿਆ।
