ਸਰਕਾਰ ਵੱਲੋਂ ਜਾਰੀ ਇੱਕ ਨਵੇਂ ਨੋਟੀਫਿਕੇਸ਼ਨ ਦੇ ਅਨੁਸਾਰ, ਰਿਟੇਲ ਆਊਟਲੇਟਾਂ ‘ਤੇ ਮੋਟਰ ਸਪਿਰਿਟ ਤੇ ਤੇ ਹਾਈ-ਸਪੀਡ ਡੀਜ਼ਲ (HSD) ਦੀ ਵਿਕਰੀ ‘ਤੇ ਨਵੀਆਂ ਪਾਬੰਦੀਆਂ ਲਗਾਈਆਂ ਗਈਆਂ ਹਨ। ਇਨ੍ਹਾਂ ਨਵੇਂ ਨਿਯਮਾਂ ਦੇ ਤਹਿਤ, ਕੋਈ ਵੀ ਵਾਹਨ ਜਾਂ ਗਾਹਕ ਇੱਕ ਦਿਨ ‘ਚ ਪੈਟਰੋਲ ਪੰਪ ਤੋਂ 200 ਲੀਟਰ ਤੋਂ ਵੱਧ ਡੀਜ਼ਲ ਨਹੀਂ ਖਰੀਦ ਸਕੇਗਾ। ਇਸ ਤੋਂ ਇਲਾਵਾ, ਵਪਾਰਕ (ਕਮਰਸ਼ੀਅਲ) ਤੇ ਸੰਸਥਾਗਤ ਗਾਹਕਾਂ ਨੂੰ ਆਮ ਪੈਟਰੋਲ ਪੰਪਾਂ ਤੋਂ ਸਿੱਧਾ ਬਾਲਣ ਖਰੀਦਣ ਤੋਂ ਵਰਜਿਤ ਹੈ। ਇਹ ਵਿਵਸਥਾ ਸ਼ੁਰੂ ਅਗਲੇ 90 ਦਿਨਾਂ ਲਈ ਲਾਗੂ ਰਹੇਗੀ। ਨਵੇਂ ਦਿਸ਼ਾ-ਨਿਰਦੇਸ਼ਾਂ ਦੇ ਅਨੁਸਾਰ, ਵਪਾਰਕ ਗਾਹਕਾਂ ਨੂੰ ਹੁਣ ਆਮ ਰਿਟੇਲ ਪੈਟਰੋਲ ਪੰਪਾਂ ਤੋਂ ਈਂਧਨ ਖਰੀਦਣ ਦੀ ਆਗਿਆ ਨਹੀਂ ਹੋਵੇਗੀ। ਸਰਕਾਰ ਨੇ ਸਪੱਸ਼ਟ ਨਿਰਦੇਸ਼ ਜਾਰੀ ਕੀਤੇ ਹਨ ਕਿ ਇਨ੍ਹਾਂ ਵਪਾਰਕ ਗਾਹਕਾਂ ਨੂੰ ਆਪਣੇ ਸਮਰਪਿਤ ਖਪਤਕਾਰ ਪੰਪਾਂ ਤੋਂ ਲੋੜੀਂਦਾ ਪੈਟਰੋਲ ਜਾਂ ਹਾਈ-ਸਪੀਡ ਡੀਜ਼ਲ ਖਰੀਦਣਾ ਹੋਵੇਗਾ।

ਨੋਟੀਫਿਕੇਸ਼ਨ ‘ਚ ਸਪੱਸ਼ਟ ਤੌਰ ‘ਤੇ ਕਿਹਾ ਗਿਆ ਹੈ ਕਿ ਪੈਟਰੋਲ ਪੰਪ ਡੀਲਰਾਂ ਨੂੰ ਸਖ਼ਤੀ ਨਾਲ ਨਿਰਦੇਸ਼ ਦਿੱਤਾ ਗਿਆ ਹੈ ਕਿ ਉਹ ਇੱਕ ਦਿਨ ‘ਚ ਕਿਸੇ ਵੀ ਗਾਹਕ ਜਾਂ ਵਾਹਨ ਨੂੰ 200 ਲੀਟਰ ਤੋਂ ਵੱਧ ਹਾਈ-ਸਪੀਡ ਡੀਜ਼ਲ ਨਾ ਵੇਚਣ।  ਕਿਉਂਕਿ ਇੱਕ ਆਮ ਕਾਰ ਦੀ ਈਂਧਨ ਟੈਂਕ ਸਮਰੱਥਾ 200 ਲੀਟਰ ਤੋਂ ਕਾਫ਼ੀ ਘੱਟ ਹੈ, ਇਸ ਉਪਾਅ ਦਾ ਆਮ ਕਾਰ ਮਾਲਕਾਂ ਦੇ ਰੋਜ਼ਾਨਾ ਜੀਵਨ ‘ਤੇ ਕੋਈ ਵੱਡਾ ਪ੍ਰਭਾਵ ਨਹੀਂ ਪਵੇਗਾ। ਇਸ ਦਾ ਮੁੱਖ ਪ੍ਰਭਾਵ ਭਾਰੀ ਟਰੱਕਾਂ ਜਾਂ ਜਨਰੇਟਰਾਂ ਲਈ ਵੱਡੇ ਡਰੰਮਾਂ ‘ਚ ਡੀਜ਼ਲ ਲਿਜਾਣ ਵਾਲਿਆਂ ‘ਤੇ ਪਵੇਗਾ। ਇਸ ਤੋਂ ਇਲਾਵਾ, ਇਸ ਖਰੀਦੇ ਗਏ ਹਾਈ-ਸਪੀਡ ਡੀਜ਼ਲ ਦੀ ਮੁੜ ਵਿਕਰੀ ‘ਤੇ ਪੂਰੀ ਤਰ੍ਹਾਂ ਪਾਬੰਦੀ ਲਗਾਈ ਗਈ ਹੈ। ਬਾਜ਼ਾਰ ‘ਚ ਆਮ ਤੌਰ ‘ਤੇ ਵਰਤੇ ਜਾਣ ਵਾਲੇ ਡੀਜ਼ਲ ਨੂੰ ਤਕਨੀਕੀ ਤੌਰ ‘ਤੇ “ਹਾਈ-ਸਪੀਡ ਡੀਜ਼ਲ” ਕਿਹਾ ਜਾਂਦਾ ਹੈ। ਇਹ ਪੈਟਰੋਲੀਅਮ ਤੋਂ ਪ੍ਰਾਪਤ ਇੱਕ ਉੱਚ-ਗੁਣਵੱਤਾ ਵਾਲਾ ਸਟੈਂਡਰਡ ਫਿਊਲ ਹੈ।