ਹਿਮਾਚਲ ‘ਚ ਰੈੱਡ ਅਲਰਟ ਦੇ ਵਿਚਕਾਰ ਅਤੇ ਮੀਂਹ ਕਾਰਨ ਤਬਾਹੀ ਦਾ ਦੌਰ ਜਾਰੀ ਹੈ। ਹਿਮਾਚਲ ਪ੍ਰਦੇਸ਼ ਵਿੱਚ ਪਿਛਲੇ ਤਿੰਨ ਦਿਨਾਂ ਤੋਂ ਮਾਨਸੂਨ ਦਾ ਜੋ ਭਿਆਨਕ ਰੂਪ ਦੇਖਣ ਨੂੰ ਮਿਲ ਰਿਹਾ ਹੈ, ਅਜਿਹਾ ਨਜ਼ਾਰਾ ਪਹਿਲਾਂ ਕਦੇ ਨਹੀਂ ਦੇਖਿਆ ਗਿਆ। ਹਰ ਥਾਂ ਉੱਤੇ ਸਥਿਤੀ ਬੇਕਾਬੂ ਹੋ ਗਈ ਹੈ। ਹਿਮਾਚਲ ‘ਚ ਭਾਰੀ ਮੀਂਹ ਨੇ ਜਨਜੀਵਨ ਅਸਥਿਰ ਕਰ ਦਿੱਤਾ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਸੋਮਵਾਰ ਦੁਪਹਿਰ ਤੱਕ ਛੇ ਜ਼ਿਲ੍ਹਿਆਂ ਵਿੱਚ ਹੜ੍ਹ ਦੀ ਚਿਤਾਵਨੀ ਜਾਰੀ ਕੀਤੀ ਗਈ ਹੈ।

ਮੀਂਹ ਕਾਰਨ ਪਿਛਲੇ 24 ਘੰਟਿਆਂ ਵਿੱਚ 15 ਲੋਕਾਂ ਦੀ ਮੌਤ ਹੋ ਗਈ ਹੈ। ਇਸ ਦੌਰਾਨ ਜ਼ਮੀਨ ਖਿਸਕਣ ਕਾਰਨ ਛੇ ਕੌਮੀ ਮਾਰਗਾਂ ਸਮੇਤ 828 ਸੜਕਾਂ ਬੰਦ ਹਨ। ਇਸੇ ਤਰ੍ਹਾਂ 4686 ਬਿਜਲੀ ਟਰਾਂਸਫਾਰਮਰ ਅਤੇ 785 ਜਲ ਸਕੀਮਾਂ ਬੰਦ ਪਈਆਂ ਹਨ। ਮਨਾਲੀ, ਸੋਲਨ ਅਤੇ ਰੋਹੜੂ ਵਿੱਚ ਮੀਂਹ ਨੇ ਪਿਛਲੇ ਸਾਰੇ ਰਿਕਾਰਡ ਤੋੜ ਦਿੱਤੇ ਹਨ।ਸੂਬੇ ‘ਚ ਲਗਾਤਾਰ ਤੀਜੇ ਦਿਨ ਵੀ ਭਾਰੀ ਮੀਂਹ ਪੈ ਰਿਹਾ ਹੈ। ਮੀਂਹ ਕਾਰਨ ਲਗਭਗ ਅੱਧਾ ਹਿਮਾਚਲ ਹਨੇਰੇ ਵਿੱਚ ਹੈ। ਸੂਬੇ ਭਰ ਵਿੱਚ 4686 ਟਰਾਂਸਫਾਰਮਰ ਠੱਪ ਪਏ ਹਨ। ਕੁੱਲੂ ਜ਼ਿਲ੍ਹੇ ਵਿੱਚ ਸਭ ਤੋਂ ਵੱਧ 1849 ਟਰਾਂਸਫਾਰਮਰ ਬੰਦ ਪਏ ਸੋਲਨ ਜ਼ਿਲ੍ਹੇ ਵਿੱਚ 709, ਮੰਡੀ ਵਿੱਚ 643, ਊਨਾ ਵਿੱਚ 97, ਸਿਰਮੌਰ ਵਿੱਚ 473, ਸ਼ਿਮਲਾ ਵਿੱਚ 551, ਕਾਂਗੜਾ ਵਿੱਚ 03, ਕਿਨੌਰ ਵਿੱਚ 89, ਲਾਹੌਲ-ਸਪੀਤੀ ਵਿੱਚ 272 ਟਰਾਂਸਫਾਰਮਰ ਬੰਦ ਪਏ ਹਨ। ਬਿਲਾਸਪੁਰ ਵਿੱਚ ਸਾਰੇ ਟਰਾਂਸਫਾਰਮਰ ਬਹਾਲ ਕਰ ਦਿੱਤੇ ਗਏ ਹਨ।