ਜਲੰਧਰ, ਵਜਰਾ ਕੋਰ ਨੇ 9ਵਾਂ ਟ੍ਰਾਈ-ਸਰਵਿਸਿਸ ਵੈਟਰਨਜ਼ ਡੇਅ ਅਤੇ 77ਵਾਂ ਆਰਮੀ ਡੇਅ ਸਨਮਾਨ, ਸ਼ੁਕਰਗੁਜ਼ਾਰੀ ਅਤੇ ਦੋਸਤੀ ਦੇ ਦਿਲਕਸ਼ ਪ੍ਰਦਰਸ਼ਨ ਨਾਲ ਮਨਾਇਆ। ਇਸ ਮਹੱਤਵਪੂਰਨ ਮੌਕੇ ‘ਤੇ ਦੇਸ਼ ਲਈ ਆਪਣਾ ਜੀਵਨ ਸਮਰਪਿਤ ਕਰਨ ਵਾਲੇ ਉਨ੍ਹਾਂ ਯੋਧਿਆਂ ਦੀ ਨਿਰਸਵਾਰਥ ਕੁਰਬਾਨੀ ਅਤੇ ਅਮੁੱਲ ਯੋਗਦਾਨ ਨੂੰ ਸਨਮਾਨਿਤ ਕੀਤਾ ਗਿਆ।
ਵੈਟਰਨਜ਼ ਡੇ ਹਰ ਸਾਲ 14 ਜਨਵਰੀ ਨੂੰ ਭਾਰਤ ਦੇ ਪਹਿਲੇ ਆਰਮੀ ਕਮਾਂਡਰ-ਇਨ-ਚੀਫ, ਮਰਹੂਮ ਫੀਲਡ ਮਾਰਸ਼ਲ ਕੋਡਾਂਡੇਰਾ ਮਡੱਪਾ ਕਰਿਅੱਪਾ ਦੀ ਸੇਵਾਮੁਕਤੀ ਦੀ ਯਾਦ ਵਿੱਚ ਮਨਾਇਆ ਜਾਂਦਾ ਹੈ ਅਤੇ 15 ਜਨਵਰੀ ਨੂੰ ਮਨਾਇਆ ਜਾਣ ਵਾਲਾ ਸੈਨਾ ਦਿਵਸ, 1949 ਵਿੱਚ ਭਾਰਤੀ ਸੈਨਾ ਦੇ ਪਹਿਲੇ ਭਾਰਤੀ ਕਮਾਂਡਰ-ਇਨ-ਚੀਫ਼ ਦੇ ਰੂਪ ਵਿੱਚ ਉਨ੍ਹਾਂ ਦੀ ਇਤਿਹਾਸਕ ਨਿਯੁਕਤੀ ਦੀ ਯਾਦ ਦਿਵਾਉਂਦਾ ਹੈ ।
ਸਮਾਰੋਹ ਦੀ ਸ਼ੁਰੂਆਤ ਵਜਰਾ ਵਾਰ ਮੈਮੋਰੀਅਲ ਵਿਖੇ ਲੈਫਟੀਨੈਂਟ ਜਨਰਲ ਅਜੈ ਚਾਂਦਪੁਰੀਆ, ਏਵੀਐਸਐਮ, ਵੀਐਸਐਮ, ਜਨਰਲ ਅਫਸਰ ਕਮਾਂਡਿੰਗ (ਜੀਓਸੀ) ਵਜਰਾ ਕੋਰ ਵੱਲੋਂ ਸ਼ਹੀਦ ਨਾਇਕਾਂ ਨੂੰ ਸ਼ਰਧਾਂਜਲੀ ਅਰਪਿਤ ਕਰਨ ਨਾਲ ਹੋਈ । ਤਿੰਨਾਂ ਸੈਨਾਵਾਂ ਦੀ ਨੁਮਾਇੰਦਗੀ ਕਰਨ ਵਾਲੇ ਸਾਬਕਾ ਸੈਨਿਕਾਂ ਨੇ ਵੀ ਸ਼ਹੀਦ ਨਾਇਕਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ । ਰਾਸ਼ਟਰ ਨੇ ਉਨ੍ਹਾਂ ਬਹਾਦਰਾਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਜਿਨ੍ਹਾਂ ਨੇ ਇਸ ਉਦੇਸ਼ ਲਈ ਸਰਵਉੱਚ ਕੁਰਬਾਨੀ ਦਿੱਤੀ। 200 ਤੋਂ ਵੱਧ ਸਾਬਕਾ ਸੈਨਿਕਾਂ, ਵੀਰ ਨਾਰੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੇ ਵਜਰਾ ਸੈਨਿਕ ਸੰਸਥਾਨ ਵਿੱਚ ਆਯੋਜਿਤ ਇੱਕ ਗੱਲਬਾਤ ਅਤੇ ਸਨਮਾਨ ਪ੍ਰੋਗਰਾਮ ਵਿੱਚ ਹਿੱਸਾ ਲਿਆ । ਇਸ ਮੌਕੇ ਤੇ ਆਰਮੀ ਪਾਈਪ ਬੈਂਡ ਦੁਆਰਾ ਵਜਾਏ ਗਏ “ਵੀ ਫਾਰ ਵੈਟਰਨਜ਼” ਦੀ ਪ੍ਰੇਰਣਾਦਾਇਕ ਧੁਨ ਹਰ ਪਾਸੇ ਗੂੰਜ ਗਈ ।
ਵੈਟਰਨਜ਼ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਦੀਆਂ ਸ਼ਿਕਾਇਤਾਂ ਨੂੰ ਵਜਰਾ ਵੈਟਰਨਜ਼ ਅਸਿਸਟੈਂਸ ਸੈਂਟਰ, ਆਰਮੀ ਵੈਲਫੇਅਰ ਪਲੇਸਮੈਂਟ ਆਰਗੇਨਾਈਜ਼ੇਸ਼ਨ, ਡਿਫੈਂਸ ਪੈਨਸ਼ਨ ਵੰਡ ਦਫਤਰ ਅਤੇ ਜ਼ਿਲ੍ਹਾ ਸੈਨਿਕ ਬੋਰਡ ਦੁਆਰਾ ਮੌਕੇ ‘ਤੇ ਸਹਾਇਤਾ ਪ੍ਰਦਾਨ ਕਰਕੇ ਹੱਲ ਕੀਤਾ ਗਿਆ।
