ਭਾਰਤੀ ਰੇਲਵੇ ਆਪਣੇ ਯਾਤਰੀ ਰਿਜ਼ਰਵੇਸ਼ਨ ਸਿਸਟਮ (PRS) ਨੂੰ ਆਧੁਨਿਕ ਤਕਨਾਲੋਜੀ ਨਾਲ ਅਪਗ੍ਰੇਡ ਕਰਨ ਜਾ ਰਿਹਾ ਹੈ। ਇਸ ਨਾਲ ਰੇਲਵੇ ਦੀ ਟਿਕਟ ਬੁਕਿੰਗ ਸਮਰੱਥਾ ਚਾਰ ਗੁਣਾ ਵੱਧ ਜਾਵੇਗੀ। ਅਪਗ੍ਰੇਡ ਤੋਂ ਬਾਅਦ ਇਹ ਸਿਸਟਮ ਪ੍ਰਤੀ ਮਿੰਟ ਇੱਕ ਲੱਖ ਟਿਕਟਾਂ ਬੁੱਕ ਕਰਨ ਦੇ ਯੋਗ ਹੋਵੇਗਾ। ਇਸ ਵੇਲੇ ਇਹ ਸਮਰੱਥਾ 25,000 ਟਿਕਟਾਂ ਪ੍ਰਤੀ ਮਿੰਟ ਹੈ। ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਨੇ ਸੰਸਦ ਨੂੰ ਦੱਸਿਆ ਕਿ ਰੇਲਵੇ ਸੈਂਟਰਲ ਫਾਰ ਰੇਲਵੇ ਇਨਫਰਮੇਸ਼ਨ ਸਿਸਟਮ (CRIS) ਰਾਹੀਂ PRS ਦਾ ਪੂਰੀ ਤਰ੍ਹਾਂ ਪੁਨਰਗਠਨ ਕਰ ਰਿਹਾ ਹੈ।  ਇਹ ਇਟੇਨੀਅਮ ਸਰਵਰ ਅਤੇ ਓਪਨਵੀਐਮਐਸ (Virtual memory system) ‘ਤੇ ਚੱਲਦਾ ਹੈ। ਇਸ ਕਾਰਨ ਮੌਜੂਦਾ PRS ਸਿਸਟਮ ਨੂੰ ਰਵਾਇਤੀ ਤਕਨਾਲੋਜੀ ਸਿਸਟਮ ਤੋਂ ਨਵੀਨਤਮ ਕਲਾਉਡ ਤਕਨਾਲੋਜੀ ਸਿਸਟਮ ਵਿੱਚ ਅੱਪਗ੍ਰੇਡ ਕਰਨ ਦੀ ਲੋੜ ਹੈ।

ਰੇਲ ਮੰਤਰੀ ਨੇ ਕਿਹਾ ਕਿ ਰੇਲਵੇ ਨੇ ਹਾਲ ਹੀ ਵਿੱਚ ‘Railvan’ ਐਪ ਵੀ ਲਾਂਚ ਕੀਤੀ ਹੈ, ਜਿਸ ਰਾਹੀਂ ਯਾਤਰੀ ਆਪਣੇ ਮੋਬਾਈਲ ਤੋਂ ਰਾਖਵੀਆਂ ਅਤੇ ਅਣਰਾਖਵੀਆਂ ਦੋਵੇਂ ਟਿਕਟਾਂ ਬੁੱਕ ਕਰ ਸਕਦੇ ਹਨ।ਯਾਤਰੀਆਂ ਦੀ ਸਹੂਲਤ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਰੇਲਵੇ ਨੇ 1 ਨਵੰਬਰ, 2024 ਤੋਂ ਰਾਖਵੀਆਂ ਟਿਕਟਾਂ ਦੀ ਐਡਵਾਂਸ ਰਿਜ਼ਰਵੇਸ਼ਨ ਪੀਰੀਅਡ (ARP) ਘਟਾ ਕੇ 60 ਦਿਨ ਕਰ ਦਿੱਤੀ ਹੈ, ਜੋ ਕਿ ਪਹਿਲਾਂ 120 ਦਿਨ ਸੀ। ਮੰਤਰੀ ਦੇ ਅਨੁਸਾਰ, ਇਹ ਬਦਲਾਅ ਬੁਕਿੰਗ ਰੁਝਾਨ ਨੂੰ ਬਿਹਤਰ ਬਣਾਉਣ ਅਤੇ ਰੱਦ ਕਰਨ ਦੀਆਂ ਘਟਨਾਵਾਂ ਨੂੰ ਘਟਾਉਣ ਲਈ ਕੀਤਾ ਗਿਆ ਹੈ।