ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇੱਕ ਵੱਡਾ ਕੂਟਨੀਤਕ ਅਤੇ ਆਰਥਿਕ ਫ਼ੈਸਲਾ ਲੈਂਦਿਆਂ ਰੂਸ ਨਾਲ ਜੁੜੀਆਂ ਕਈ ਸਖ਼ਤ ਪਾਬੰਦੀਆਂ, ਆਰਥਿਕ ਰੋਕਾਂ ਅਤੇ ਦਰਾਮਦੀ ਟੈਕਸਾਂ (ਟੈਰਿਫ਼) ਵਿੱਚ ਵਿਆਪਕ ਛੋਟ ਦੇਣ ਦਾ ਐਲਾਨ ਕੀਤਾ ਹੈ।
ਵ੍ਹਾਈਟ ਹਾਊਸ ਵੱਲੋਂ ਜਾਰੀ ਕੀਤੇ ਗਏ ਇੱਕ ਅਧਿਕਾਰਤ ਹੁਕਮ ਰਾਹੀਂ ਇਸ ਫ਼ੈਸਲੇ ਦੀ ਪੁਸ਼ਟੀ ਕੀਤੀ ਗਈ ਹੈ। ਇਹ ਸਖ਼ਤ ਪਾਬੰਦੀਆਂ ਅਤੇ ਟੈਰਿਫ਼ ਉਸ ਕਾਨੂੰਨ ਅਧੀਨ ਅਮਲ ਵਿੱਚ ਲਿਆਂਦੇ ਜਾਣੇ ਸਨ, ਜਿਸ ਤੇ ਟਰੰਪ ਨੇ ਪਿਛਲੇ ਮਹੀਨੇ ਹੀ ਦਸਤਖ਼ਤ ਕਰਕੇ ਮਨਜ਼ੂਰੀ ਦਿੱਤੀ ਸੀ।
ਹਾਲਾਂਕਿ, ਇਹ ਨਿਯਮ ਜ਼ਮੀਨੀ ਪੱਧਰ ਤੇ ਲਾਗੂ ਹੋਣ ਤੋਂ ਕੁਝ ਦਿਨ ਪਹਿਲਾਂ ਹੀ ਟਰੰਪ ਨੇ ਇਨ੍ਹਾਂ ਵਿੱਚ ਵੱਡੀ ਢਿੱਲ ਦੇ ਦਿੱਤੀ ਹੈ, ਜਿਸ ਕਾਰਨ ਭਾਰਤ, ਚੀਨ ਸਮੇਤ ਕਈ ਵਿਸ਼ਵ ਅਰਥਚਾਰਿਆਂ ਨੇ ਸੁੱਖ ਦਾ ਸਾਹ ਲਿਆ ਹੈ।
ਟਰੰਪ ਦਾ ਇਹ ਰੁਖ਼ ਅਜਿਹੇ ਨਾਜ਼ੁਕ ਮੋੜ ਤੇ ਸਾਹਮਣੇ ਆਇਆ ਹੈ ਜਦੋਂ ਮਾਸਕੋ ਪ੍ਰਤੀ ਉਨ੍ਹਾਂ ਦਾ ਰਵੱਈਆ ਨਰਮ ਦਿਖਾਈ ਦੇ ਰਿਹਾ ਹੈ, ਜਦਕਿ ਦੂਜੇ ਪਾਸੇ ਉਹ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਦੀ ਜਨਤਕ ਤੌਰ ਤੇ ਤਿੱਖੀ ਨੁਕਤਾਚੀਨੀ ਕਰ ਰਹੇ ਹਨ। ਟਰੰਪ ਨੇ ਇੱਥੋਂ ਤੱਕ ਆਖ ਦਿੱਤਾ ਹੈ ਕਿ ਯੂਕਰੇਨ ਨੂੰ ਹੁਣ ਆਪਣਾ ਨਵਾਂ ਆਗੂ ਚੁਣਨ ਦੀ ਲੋੜ ਹੈ।