ਤੇਲੰਗਾਨਾ ਦੇ ਸਿੱਦੀਪੇਟ ਤੋਂ ਇੱਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਇੱਕ ਨੌਜਵਾਨ ਨੇ ਆਪਣੀ ਜ਼ਿੱਦ ਕਾਰਨ ਖੁਦਕੁਸ਼ੀ ਕਰ ਲਈ। ਨੌਜਵਾਨ ਨੇ ਅਜਿਹੀ ਜ਼ਿੱਦ ਕੀਤੀ ਕਿ ਉਸਦੇ ਮਾਪੇ ਚਾਹੁੰਦੇ ਹੋਏ ਵੀ ਪੂਰਾ ਨਹੀਂ ਕਰ ਸਕੇ। ਨੌਜਵਾਨ ਆਪਣੇ ਮਾਪਿਆਂ ਤੋਂ ਉਸਨੂੰ ਇੱਕ BMW ਕਾਰ ਖਰੀਦਣ ਦੀ ਮੰਗ ਕਰ ਰਿਹਾ ਸੀ। ਪਰ ਉਸਦੇ ਮਾਪਿਆਂ ਕੋਲ ਇੰਨੇ ਪੈਸੇ ਨਹੀਂ ਸਨ। ਇਸ ਲਈ ਉਨ੍ਹਾਂ ਨੇ ਇੱਕ ਸਵਿਫਟ ਡਿਜ਼ਾਇਰ ਕਾਰ ਖਰੀਦੀ, ਜਿਸ ਤੋਂ ਬਾਅਦ ਨੌਜਵਾਨ ਨੇ ਖੁਦਕੁਸ਼ੀ ਕਰ ਲਈ।ਸਿੱਦੀਪੇਟ ਦੇ ਜਗਦੇਵਪੁਰ ਮੰਡਲ ਦੇ ਪਿੰਡ ਚਟਲਾਪੱਲੀ ਦੇ ਬੋਮਾ ਕਨਕਈਆ ਦੇ 21 ਸਾਲਾ ਪੁੱਤਰ ਜੌਨੀ ਨੇ ਖੁਦਕੁਸ਼ੀ ਕਰ ਲਈ। ਉਹ ਆਪਣੇ ਪਿਤਾ ਤੋਂ BMW ਕਾਰ ਖਰੀਦਣ ਦੀ ਮੰਗ ਕਰ ਰਿਹਾ ਸੀ। ਉਹ ਬੀਐਮਡਬਲਿਊ ਕਾਰ ਨੂੰ ਲੈਕੇ ਅਕਸਰ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਝਗੜਾ ਕਰਦਾ ਰਹਿੰਦਾ ਸੀ ਅਤੇ ਧਮਕੀ ਦਿੰਦਾ ਸੀ ਕਿ ਜੇਕਰ ਉਸਨੂੰ BMW ਕਾਰ ਨਹੀਂ ਮਿਲੀ ਤਾਂ ਉਹ ਮਰ ਜਾਵੇਗਾ।ਜੌਨੀ ਦੇ ਮਾਪਿਆਂ ਨੇ ਉਸਨੂੰ ਮਨਾਉਣ ਦੀ ਬਹੁਤ ਕੋਸ਼ਿਸ਼ ਕੀਤੀ। ਜੌਨੀ ਦੇ ਮਾਪਿਆਂ ਦੀ ਵਿੱਤੀ ਹਾਲਤ ਚੰਗੀ ਨਹੀਂ ਹੈ ਅਤੇ ਉਹ BMW ਕਾਰ ਖਰੀਦਣ ਦੇ ਸਮਰੱਥ ਨਹੀਂ ਹਨ। ਪਰ ਜੌਨੀ BMW ਕਾਰ ਖਰੀਦਣ ‘ਤੇ ਅੜਿਆ ਰਿਹਾ। ਬਹੁਤ ਸਮਝਾਉਣ ਤੋਂ ਬਾਅਦ ਵੀ, ਜਦੋਂ ਜੌਨੀ ਨਾ ਮੰਨਿਆ ਤਾਂ ਉਸਦੇ ਪਿਤਾ ਨੇ ਕਰਜ਼ਾ ਲੈ ਕੇ ਇੱਕ ਮਾਰੂਤੀ ਸਵਿਫਟ ਡਿਜ਼ਾਇਰ ਕਾਰ ਖਰੀਦੀ।ਪਰ ਜੌਨੀ ਇੱਕ BMW ਚਾਹੁੰਦਾ ਸੀ। ਉਹ ਘਰਦਿਆਂ ਤੋਂ ਮੁੜ BMW ਕਾਰ ਖਰੀਦਣ ਦੀ ਮੰਗ ਕਰਨ ਲੱਗ ਪਿਆ। ਪਰ ਮਾਪਿਆਂ ਨੇ ਉਸਨੂੰ ਸਪੱਸ਼ਟ ਤੌਰ ‘ਤੇ ਇਨਕਾਰ ਕਰ ਦਿੱਤਾ ਕਿ ਉਨ੍ਹਾਂ ਕੋਲ BMW ਕਾਰ ਖਰੀਦਣ ਲਈ ਪੈਸੇ ਨਹੀਂ ਹਨ। ਇਸ ਤੋਂ ਗੁੱਸੇ ਵਿੱਚ, ਜੌਨੀ ਨੇ ਸ਼ੁੱਕਰਵਾਰ ਨੂੰ ਹੀ ਆਪਣੇ ਖੇਤ ਵਿੱਚ ਜ਼ਹਿਰ ਖਾ ਲਿਆ। ਜਦੋਂ ਪਰਿਵਾਰਕ ਮੈਂਬਰਾਂ ਨੇ ਉਸਨੂੰ ਦੇਖਿਆ, ਤਾਂ ਉਹ ਉਸਨੂੰ ਸਰਕਾਰੀ ਹਸਪਤਾਲ ਲੈ ਗਏ। ਉੱਥੋਂ ਉਸਨੂੰ ਬਿਹਤਰ ਇਲਾਜ ਲਈ ਸਿੱਦੀਪੇਟ ਦੇ (RVM) ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸਜ਼ ਐਂਡ ਰਿਸਰਚ ਸੈਂਟਰ ਲਿਜਾਇਆ ਗਿਆ। ਸ਼ਨੀਵਾਰ ਰਾਤ ਨੂੰ ਜੌਨੀ ਦੀ ਹਾਲਤ ਵਿਗੜ ਗਈ ਅਤੇ ਇਲਾਜ ਦੌਰਾਨ ਉਸਦੀ ਮੌਤ ਹੋ ਗਈ।