ਬਿਹਾਰ ਦੇ ਜ਼ਿਲ੍ਹੇ ਮੁਜ਼ੱਫਰਪੁਰ ਤੋਂ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰਨ ਵਾਲੀ ਘਟਨਾ ਵਾਪਰੀ ਹੈ।ਮੁਜ਼ੱਫਰਪੁਰ ਵਿੱਚ 13 ਸਾਲਾ ਲੜਕੀ ਨੂੰ 6 ਵਿਅਕਤੀਆਂ ਨੇ ਅਗਵਾ ਕਰਕੇ 28 ਦਿਨਾਂ ਤੱਕ ਸਮੂਹਿਕ ਬਲਾਤਕਾਰ ਕੀਤਾ ।ਪੀੜਤਾ ਦੀ ਮਾਂ ਦੇ ਬਿਆਨ ਅਨੁਸਾਰ 5 ਅਗਸਤ ਦੀ ਸ਼ਾਮ ਨੂੰ ਮੁਲਜ਼ਮ ਨੇ ਉਸ ਨੂੰ ਫੋਨ ਕਰ ਕੇ ਕੁੜੀ ਨੂੰ ਸਰਾਇਆ ਚੌਕ ਤੋਂ ਲਿਜਾਉਣ ਲਈ ਕਿਹਾ। ਪੁਲਿਸ ਨੇ ਆਈਪੀਸੀ ਦੀ ਧਾਰਾ 366ਏ ਅਤੇ ਪੋਕਸੋ ਐਕਟ ਤਹਿਤ ਐਫਆਈਆਰ ਦਰਜ ਕਰਕੇ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਲਈ ਵੱਖ-ਵੱਖ ਥਾਵਾਂ ’ਤੇ ਛਾਪੇਮਾਰੀ ਕਰ ਰਹੀ ਹੈ।

ਪੀੜਤਾ ਦੀ ਮਾਂ ਨੇ ਲਿਖਤੀ ਸ਼ਿਕਾਇਤ ‘ਚ ਦੋਸ਼ ਲਾਇਆ ਕਿ 9 ਜੁਲਾਈ ਨੂੰ ਸਰਾਇਆ ਥਾਣਾ ਖੇਤਰ ਦੇ ਪਿੰਡ ਸਿਸਵਾਨੀਆ ਤੋਂ ਦੋਸ਼ੀ ਕਾਰ ‘ਚ ਆਏ ਅਤੇ ਉਨ੍ਹਾਂ ਦੀ ਬੇਟੀ ਨੂੰ ਅਗਵਾ ਕਰਕੇ ਲੈ ਗਏ। ਸ਼ਿਕਾਇਤ ਵਿੱਚ ਕਿਹਾ ਕਿ 9 ਜੁਲਾਈ ਨੂੰ, ਮੈਂ ਮੁਲਜ਼ਮਾਂ ਵਿਰੁੱਧ ਲਿਖਤੀ ਸ਼ਿਕਾਇਤ ਦਰਜ ਕਰਵਾਈ ਪਰ ਜ਼ਿਲ੍ਹਾ ਪੁਲਿਸ ਨੇ ਕੋਈ ਕਾਰਵਾਈ ਨਹੀਂ ਕੀਤੀ। 5 ਅਗਸਤ ਨੂੰ ਰਾਤ 8 ਵਜੇ ਮੈਨੂੰ ਮੁਲਜ਼ਮ ਦਾ ਫੋਨ ਆਇਆ ਕਿ ਆਪਣੀ ਲੜਕੀ ਨੂੰ ਸਰਾਇਆ ਚੌਕ ਤੋਂ ਚੁੱਕ ਕੇ ਲੈ ਜਾਣ ਲਈ ਕਿਹਾ। ਜਦੋਂ ਮੈਂ ਉੱਥੇ ਪੁੱਜੀ ਤਾਂ ਕੁੜੀ ਲਾਵਾਰਸ ਹਾਲਤ ਵਿੱਚ ਪਈ ਮਿਲੀ। ਮੈਂ ਉਸ ਨੂੰ ਘਰ ਲੈ ਆਈ ਅਤੇ ਪੁਲਿਸ ਨੂੰ ਘਟਨਾ ਬਾਰੇ ਸੂਚਿਤ ਕੀਤਾ।ਪੁਲਿਸ ਮੁਤਾਬਕ ਪੀੜਤਾ ਫੇਸਬੁੱਕ ‘ਤੇ ਦੋਸ਼ੀ ਦੇ ਸੰਪਰਕ ‘ਚ ਆਈ ਸੀ। ਇਸ ਮਾਮਲੇ ਵਿਚ ਪੁਲਿਸ ਨੇ ਆਈਪੀਸੀ ਦੀ ਧਾਰਾ 366 ਏ ਅਤੇ ਪੋਕਸੋ ਐਕਟ ਦੇ ਤਹਿਤ ਐਫਆਈਆਰ ਦਰਜ ਕੀਤੀ ਹੈ। ਅਸੀਂ ਧਾਰਾ 164 ਤਹਿਤ ਡਿਊਟੀ ਮੈਜਿਸਟ੍ਰੇਟ ਦੇ ਸਾਹਮਣੇ ਪੀੜਤਾ ਦੇ ਬਿਆਨ ਦਰਜ ਕਰਵਾਏ ਹਨ ਅਤੇ ਉਸ ਦਾ ਮੈਡੀਕਲ ਕਰਵਾਇਆ ਹੈ। ਉਸ ਨੇ ਮੁਲਜ਼ਮ ਦੀ ਪਛਾਣ ਦੱਸੀ ਹੈ। ਉਨ੍ਹਾਂ ਨੂੰ ਫੜਨ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ।