ਲੁਧਿਆਣਾ ਦੇ ਇੱਕ ਮਾਲਕ ਨੂੰ ਘੋੜੇ ਨਾਲ ਇੰਨਾ ਪਿਆਰ ਸੀ ਕਿ ਉਸ ਦੀ ਮੌਤ ‘ਤੇ ਭੋਗ ਦਾ ਸਮਾਗਮ ਰੱਖ ਦਿੱਤਾ। ਇੰਨਾ ਹੀ ਨਹੀਂ ਉਸ ਨੇ ਇਸ ਸਮਾਗਮ ਲਈ ਕਾਰਡ ਵੀ ਬਣਵਾਏ ਤੇ ਗੁਰਦੁਆਰਾ ਸਾਹਿਬ ‘ਚ ਪ੍ਰੋਗਰਾਮ ਰੱਖਿਆ। ਇਸ ‘ਚ ਉਨ੍ਹਾਂ ਨੇ ਆਪਣੇ ਰਿਸ਼ਤੇਦਾਰਾਂ ਨੂੰ ਸੱਦਾ ਦਿੱਤਾ ਹੈ। ਘੋੜੇ ਦੀ ਆਤਮਕ ਸ਼ਾਂਤੀ ਦੇ ਲਈ ਰੱਖਿਆ ਗਿਆ ਇਹ ਪ੍ਰੋਗਰਾਮ ਗੁਰਦੁਆਰਾ ਪਰਮੇਸ਼ਰ ਦੁਆਰ, ਪਿੰਡ ਖਾਂਸੀ ਕਲਾਂ ਵਿਖੇ ਹੋਵੇਗਾ।
ਇਸ ਘੋੜੇ ਦੀ ਮੌਤ 38 ਮਹੀਨੇ ਉਮਰ ‘ਚ 8 ਅਕਤੂਬਰ ਨੂੰ ਹੋਈ। ਜਨਮ ਤੋਂ ਲੈ ਕੇ ਮੌਤ ਤੱਕ ਨਾਲ ਰਹਿਣ ਕਾਰਨ ਘੋੜੇ ਦੇ ਮਾਲਕ ਨੂੰ ਉਸ ਨਾਲ ਪੁੱਤਾਂ ਵਾਂਗ ਪਿਆਰ ਹੋ ਗਿਆ। ਚਰਣਜੀਤ ਸਿੰਘ ਮੰਟਾ (ਘੋੜੇ ਦਾ ਮਾਲਕ) ਵਾਸੀ ਖਾਂਸੀ ਕਲਾਂ ਨੇ ਦੱਸਿਆ ਕਿ ਘੋੜੇ ਫ਼ਤਿਹਜੰਗ ਦਾ ਜਨਮ ਘਰ ‘ਚ ਹੋਇਆ ਸੀ ਤੇ ਬਚਪਨ ਤੋਂ ਹੀ ਉਸ ਦਾ ਵਿਵਹਾਰ ਦੋਸਤਾਨਾ ਸੀ। ਉਹ ਤੇ ਉਸ ਦੀ ਪਤਨੀ ਉਸ ਨੂੰ ਬੱਚੇ ਦੀ ਤਰ੍ਹਾਂ ਮੰਨਦੇ ਸਨ। ਬੱਚੇ ਵਿਦੇਸ਼ ‘ਚ ਸਨ ਤਾਂ ਸਾਰਾ ਦਿਨ ਘੋੜੇ ਨਾਲ ਹੀ ਸਮਾਂ ਗੁਜ਼ਾਰਦੇ ਸਨ।
ਚਰਣਜੀਤ ਨੇ ਦੱਸਿਆ ਕੇ ਜਦੋਂ ਕੋਈ ਪੁੱਛਦਾ ਕਿ ਤਹਾਡੇ ਕਿੰਨੇ ਬੱਚੇ ਹਨ ਤੇ ਉਹ ਘੋੜੇ ਸਮੇਤ ਆਪਣੇ ਤਿੰਨ ਬੱਚੇ ਦੱਸਦੇ ਸਨ।